August 21, 2021
ቃል ፕረዚደንት ኢሳይያስ ኣፈወርቂ
ኸበርክንን ዝኸበርኩምን ተመረቕቲ 34 ዙርያን 12 ዙርያ ማሞስን፡ ዝኸበርክንን ዝኸበርኩምን ወለድን ኣለይትን ሳዋ ምስ ዕዱማት፡ ፈለማ ንኹሎም ተመረቕትን ወለድን ዮሃና እንቋዕ ኣሐጎሰኩም! ንኣለይትን መማህራንን ሳዋ ከኣ ልዑል ምስጋና! 34 ዙርያ፡ ካብ ዝሓለፉ ዙርያታት ናታ ፍሉይ ሕላገትን ዝኽርታትን ዘለዋ ዙርያ እያ። ኣብ ዓለም ዝተኸስተ ለበዳ ኮሮና ብዘይካ’ቲ ዘኸተሎን ገና ዘኸትሎ ዘሎን ህልቂት፡ ንደቂ-ሰብ ናይ ተበራበር ደሃይ ይህብ። ንብዙሓት ብሰብ ፍሉይ ረብሓ ዝጋውሑ ወይ ክጋውሑ ዝጸንሑ፡ ከም ንቡር ዝተወስዱ ዘይንቡራት ኣምራትን ክብርታትን ናይ ሓዊ ፈተነ’ዩ ነይሩ። ካብኡ ዝውሰድ ትምህርቲ ከኣ ዕቱብ ምርምርን መጽናዕትን መአረምታን ዝሓትት እዩ። ብተመሰሳሳሊ፡ ምስ ለበዳ ኮሮና ብሃነፍነፍ ክዓኑ ዝጸንሐ ባህርን ጸጋታቱን ኣብ ክሊማዊ ገልበጥበጥ ኣስዒብዎ ዘሎ ክሊማዊ ሃስያ’ውን ተወሳኺ ደሃይ ተበራበር’ዩ።
