November 25, 2023
ቃለ-መሕትት ፕረዚደንት ኢሳይያስ
ምስ ጋዜጣ ኣልሸርቕ ኣልኣውሰጥ
ትርጉም – ሱሌማን መሓመድ ስዓድ
ፕረዚደንት ኢሳይያስ ኣፈወርቂ ኣብ ዋዕላ ንግስነት ስዑዲዓረብ-ኣፍሪቃ ኣብ ዝተሳተፈሉ መዓልታት፡ ምስ ጋዜጣ ኣልሸርቕ ኣልኣውሰጥ ቃለ-መሕትት ኣካዪዱ ነይሩ። እቲ ቃለ-መሕትት ኣብ ዞባዊን ዓለማዊን ጉዳያት፡ ኣብ ሽርክነት ስዑዲ-ዓረብ – ኣፍሪቃ፡ ከምኡ’ውን ኣብ ዘቤታዊ ጉዳያት ዘተኮረ እዩ ነይሩ። ምሉእ ትሕዝቶኡ ካብ ዓረብኛ ተርጒምና ነቕርበልኩም።
* ዝምድና ስዑዲ ዓረብ ምስ ሃገራት ኣፍሪቃ ፍሉይነት ዘለዎ’ዩ ተባሂሉ ይጥቀስ። ንስኻትኩም ከም ተሳተፍቲ ናይዚ ዋዕላ’ዚ፡ ፍሉይነቱ እንታይ’ዩ ትብሉ?
– የቐንየለይ። ከምቲ ዝበልካዮ ዋዕላ ስዑዲ ዓረብ-ኣፍሪቃ ኣብ ዝተፈላለዩ ቦታታትን መድረኻትን ካብ ዝካየዱ ዘለዉ ዋዕላታት ፍሉይነት ኣለዎ።
