July 23, 2021
ጒዕዞ ኣብ ተዘክሮታተይ
ደራሲ : ኣሕመ ድ ጣህር ባዱሪ
ኣእምሮ ወድ ሰብ ናይ ምርሳዕ ጸጋ ወይ ህያብ እተዓደለ`ዩ። እዚ ፍሉይ ባህሪ`ዚ ተፈጥሮኣዊ ኮይኑ፡ ሓደ ካብ ምስጢራት ህላወ`ዩ። ልክዕ`ዩ፡ ኣእምሮ፡ ሞት ምህላዋ ዘኪሩን ንዘልኣለም ካብ ህይወት ክስወር ምዃኑ ተረዲኡን ኣብ ቀጻሊ ፍርህን ጭንቀትን ከይኣቱ ዝከላኸለሉ ነገር እንተሎ፡ እዚ ናይ ምርሳዕ ባህሪኡ`ዩ። ስለ’ዚ ክርስዕ ዓቕሚ ካብ ሃለዎ፡ ንኽምሕርን ካብ ቂም፡ ሕነ ምፍዳይ፡ ጽልእን ቅርሕንትን ክርሕቅ`ውን ዓቕሚ ይህልዎ`ዩ።
ይኹን`ምበር፡ ምርሳዕ ናቱ ኣሉታዊ ሸነኻት ኣሎዎ። ወድ ሰብ፡ ከም ህይወታዊ ፍጡር፡ ንንጥፈታት ህይወቱ ዝምልከቱን ዝሕብሩን ጭብጥታት ከይተረስዑ ከለዉ መዘኻኸሪ ምስልታትን ጽሑፋትን ወይ ኣሰራትን እንተ ዘይገይሩሎም፡ ቀልጢፎም`ዮም ዝጠፍኡን ዝርስዑን። ነዚ ዝምልከት ሓደ ገጣማይ ከምዚ ይብል፡
