September 9, 2017
ሕጊ ሲቪላዊ ስርዓት ሃገረ-ኤርትራ
ቀዳማይ መጽሓፍ – ኣፈናዊ ነገራት
ቀዳማይ ኣርእስቲ – መሰረታውያን ድንጋገታት
ዓንቀጽ 1. – ተፈጻምነት
(1) እዚ ሕጊ፣ ሕጊ ሲቪላዊ ስርዓት ሃገረ-ኤርትራ ተባሂሉ ኺጥቀስ ይከኣል። ኣብ ጋዜጣ ኣዋጃት ኤርትራ ተሓቲሙ ካብ ዝወጸሉ ዕለት ጀሚሩ ድማ ተፈጻምነት ይህልዎ።
(2) ሕጊ ሲቪላዊ ስርዓት፣ ኣብ ክለ-ስልጣን ኮማዊ ኣብያተ ፍርዲ፣ ኣብያተ ፍርዲ ዞባ፣ ላዕለዋይን ርእሰ-ኣብያተ ፍርድን ንዚቐርቡ ሲቪላውን ንግዳውን ጕዳያት ንምድናይ ኣብ ዚካየድ መስርሕ ዳንነት ተፈጻምነት ይህልዎ።
ዓንቀጽ 2. – ትርጉም
(1) ኣተኣታትዋኡ ዝተፈልየ ትርጉም ዚህብ እንተ ዘይኰይኑ፣ እዞም ስዒቦም ዚርከቡ ቓላት ወይ ሓረጋት ከምዚ ዚስዕብ ትርጉም ይህልዎም፥
(ሀ) “ቃለ-ማሕላ” ማለት በቲ ወሃብ ቃል ሓቅነቱ ብሕጋዊ ኣገባብ ብዝተዋህበ ማሕላ ወይ ምርግጋጽ ተሰንዩ ብጽሑፍ ዚወሃብ መግለጺ ኽውንቶታት ማለት እዩ።
