August 26, 2017
ኣልኣሚን ዓብደለጢፍ
ብሉጽ ታሪኻዊ ስነ-ጥበባዊ ተርእዮ
ብዶ/ር ኣሕመድ ሓሰን ድሕሊ
ብሃር ስነ-ጥበባዊ ኣልኣሚን ዓብደለጢፍ ንፍርቂ ክፍለ ዘመንን ፍርቂ ዕቁድን ስነ-ጥበብ ዓጢቁ መሪርን ነዊሕን ቃልሲ ድሕሪ ምክያዱ፡ ኣብ መበል 78 ዕድሚኡ ተሰዊኡ። ምሃዚ ስነ-ጥበብ ኣልኣሚን ዓብደለጢፍ ኣብ ንእስነቱ ብዝሓደሮ ልዑል ፍቕሪ ስነ-ጥበብ መጀመርታ ምስ ስድራ ቤቱ’ዩ ተባቲኹ። ካብቲ ዝጸንሐ ኣረጊት ያታዊ ባህሊ ስለዝወጸ ቀቢላኡ ነጺሎምዎ። ልዑል ትሕዝቶን ንዝተፈላለየ ትርጉማት ክፉት ዝነበረን ስነ-ጥበባዊ ፍርያቱ ኣብ ውሽጢ መግዛእታዊ ስርዓት ኢትዮጵያ ፍርሒን ራዕዲን ፈጢሩ። ስነ-ጥበባዊ ፍርያት ብሃር ኣልኣሚን ዓብደለጢፍ ነቲ ኣብ’ቲ እዋን’ቲ ኣብ ኣእምሮን መንፈስን ኤርትራውያን ዝዕንብብ ዝነበረ ሃገራዊ ስምዒት ሓይሊን ናህሪን ወሲኹሉ እዩ።
